Add to Contacts
To: Kumunitas Karo
Lagu Karo sinoria biasana mehuli iramana, entabeh ngelandekkensa, apaika adi i endeken perkolong-kolong simejile sorana, tuhu ndengkehkensa pe entabeh. Umpamana lagu bolo-bolo, sanggar-sanggar, onggar-onggar, ara sitengen-tengen rsd,rsd. Io-oh terbayang ka pe mis gendang guro-guro jaman siadi i kesen mbelang kutanta. Enterem sindedah, tapi adu kenca ningen perkolong-kolong cengep kerina jelma nimai perkolong-kolong rende. Soalna sanga sie, lenga lit “halo-halo” alias pengeras suara. Emaka de gejek denga kin sora sindedah, sora sirende lanai terdengkeh.
Sada ciri lagu Karo sinoria, lirikna la ertentu, sang penyanyi bebas berimprovisasi. Lirikna ate-ate, dem alu sampiren-sampiren bagi pantun melayu. Gia bage, lit ka piga-piga irama si lalit lirikna, la pernah i endeken kalak, irama musikna ngenca rusur terbegi. Misalna irama musik ndikkar ras patam-patam, rsd. Bicara musik patam-patam i ikuti belas-belas pantun bagi lagu kalak negro rende uga nge ndia ateku ka rempet.
Sadanari lagu tanpa kata ndai si sangana kubegiken paksa naldok keyboard computer enda emkap lagu “Begu Deleng”. Tah kuga maka judul laguna bage la ka bo kuangka kel sejarahna, mungkin erkiteken ibas jaman siadi kerina deleng dem denga alu batang kayu simbelin. Lit kesan seram terlebih ibas berngi simbagas. Ibas dampar sideban lit ka kesanna makana taneh deleng asum sie mehumur (subur) denga sierbahansa kerina sinuan-sinuan bagepe batang kayu turah mehuli i kerangen deleng. E gia tah lit kita simeteh uga maka lit lagu si erjudul “Begu Deleng”, mehuli kang ipebetehkendu gelah kita meteh kerina. (Ja kam nda mbuyak Pa Kampoh, ersumekah kam nak, uga nina Nini Pagar kerna sejarah lagu begu deleng enda ndai)
Jaman kepeken enggo sambar, taneh mehumur menam lanai lit, begu kuta ras begu kota ngerajai negeri, begu deleng enggo nduru. (Balosam jaman sope gestok nai lit setan kota nina kalak perparte sanga e me?. Ja kam nda mbuyak MUG ma bage kapndu? Oe nindu min…)
Irama lagu begu deleng sekali-sekalin terbegi denga malap-malap, tempa begu deleng termampa-mampa ideleng meranggas. Mon-mon termampa ku taneh deleng sienggo jadi pertapaken ingan majekken rumah, lit ka si jadi villa. Bicara tuhu kin lit begu deleng, laguna ugapa pe enggo sambar judulna jadi “morah-morah begu deleng”.
Ea’ah kam sierpemeteh tahpe si meganjang sekolahndu lah pepulih deleng mehumur jadi ulu kegeluhen bagi jaman siadi. Gia begu deleng termampa, kita ula mampa, megermet. Mari siumputi dage runggu primitif bagi si tersirat bas renungen 23 sembuyak MUG, payo kuakap. Runggu boleh primitive, cara tentu sue ras jaman. Lit sirukur ngukurken strategy, lit singerana, lit penggerak lapangen, lit ka si pepulung serpi bagi sienggo isingetken per Sinabung Jaya. Kami si la erpemeteh ngikuri saja, gelah siman ikuren lah gia lit enggo me sada erbage.
Mejuah-juah kita kerina
No comments:
Post a Comment